Útilokað er að telja upp alla mögulega verkþætti í textaþjónustunni. Hér eru nokkrir mikilvægir þættir.

Skrift texta frá grunni
Skrifa texta frá grunni, út frá efnispunktum, hugmyndum, þörfum, tilgangi texta og hver lesandi er.
Taka við innlesnum texta í síma eða ritvinnsluforriti sem ég get hlustað á og unnið úr.
Eða símtal, þar sem ég sit við tölvuna, hlusta á orð viðskiptavinar, tek niður efnispunkta og vinn úr í heildstæðan texta.

Lestur og vinna í fyrirliggjandi texta eða textadrögum
Lesa og yfirfara texta eða textadrög. Spyrja spurninga ef þarf og klára, lagfæra eða endurskrifa textann, þannig að textinn og framsetning hans hæfi tilgangi og lesanda. Grunnatriði er að hugsun og boðskapur skili sér í gegnum textann.

Yfirlestur og leiðréttingar fullskrifaðs texta – prófarkalestur 
Lesa yfir fyrirliggjandi texta, svo sem á heimasíðum. Laga málfar og leiðrétta villur í stafsetningu, beygingum, tíðum og öðru.
Venjulega er fljótlegt að laga helstu villur í texta og bæta hann mikið.

Bæting á flæði og læsileika texta – handritslestur
Bæta flæði í texta. Meðal annars með tímabundnum eða varanlegum millifyrirsögnum. Færa til og endurraða efnisþáttum, setningum og orðum, helst í tímaröð. Minnka svo endurtekningar og stytta texta, en bæta í þar sem mögulega þarf. Allt til að efnið verði sem skipulegast og skýrast.
Brjóta upp og einfalda langar og flóknar setningar og orð, sérstaklega í texta sem á að flytja munnlega, talmáli.
Allt breytingar sem auðvelda lestur, sýna lesanda virðingu og auka líkur á að texti sé lesinn til enda.

Skýring texta
Auka upplýsingagildi og skýrleika texta, miðað við tilgang textans og hver lesandi hans er.
Markmiðið er að texti sé skiljanlegur og fræðandi, svari því sem honum er ætlað og valdi ekki misskilningi.

Stytting texta
Stytta texta eins og mögulegt er, án þess að skaða boðskap og gæði hans. Sífellt algengari krafa lesenda er að texti sé stuttur og skýr, annars lesi þeir hann ekki.
Ekki er öllum gefið og er seinlegra að koma hugsun og meiningu á framfæri í stuttum texta. Enda sagði rithöfundurinn á sínum tíma eitthvað á þessa leið: ,,Fyrirgefðu að ég hafði ekki tíma til að skrifa þér styttra bréf.” 
Einn möguleiki er að gera útdrátt með helstu atriðum textans, mögulega í upptalningarstíl, til að upplýsa og ná athygli. 

Samræming, málfar, stíll og framsetning 
Samræma efnisþætti, fallbeygingu nafnorða, tíð sagnorða og fleira, til dæmis í upptalningum. Einfalda texta ef mögulegt er.
Reyna að samræma og hafa svipað málfar, stíl og framsetningu alls textans, til að fá heildstæða og samræmda heildarmynd.

Hvatning í texta auglýsinga
Tryggja sem besta hvatningu, til dæmis í kynningarefni og auglýsingum. Ekki er nóg að auglýsing sé á réttri og góðri íslensku, ef hvatningu vantar. Tilgangur texta auglýsingar er að upplýsa, fá viðbrögð lesanda og hvetja hann til að kaupa vöru eða þjónustu, eða sækja um auglýst starf.   

Heimasíðuúttekt
Skoða heimasíðu heildstætt. Yfirfara hvort efni hennar virðist vera; uppfært, hæfilegt, gagnlegt og fullnægjandi fyrir lesanda og athuga hvort tenglar og annað virkar.