Ég er bóndasonur, fæddur 4. ágúst 1956. Ólst upp á Bjargi í Miðfirði í Húnaþingi vestra hjá þremur eldri systkinum og foreldrum okkar, Sigurgeiri Karlssyni og Önnu Vilhelmínu Axelsdóttur.
Þar á ég enn sterkar rætur og kenni mig oft við Bjarg, – ,,Arinbjörn frá Bjargi, slóðum Grettissögu“.

Eftir grunnskóla og landbúnaðarstörf fór ég 16 ára til fjölbreytts náms og starfa í Reykjavík næstu áratugina.
Námið var verklegt og bóklegt, á framhalds- og háskólastigi, auk margra námskeiða.
Störfin og verkefnin voru fjölbreytt, allt frá járnsmíðum og lögreglustörfum í byrjun og þar til ég lauk daglegum launuðum störfum í dómsmálaráðuneytinu haustið 2017, rúmlega sextugur. Textavinna var talsverður hluti starfa minna.

Ýmis áhugamál og félagsstörf; ljósmyndun, bassaleikur, kórsöngur, ritari, formaður og gjaldkeri í félögum og fleira skemmtilegt og gefandi. 

Var ráðherraskipaður í nefnd á vegum Alþingis, til að reyna að draga úr vægi verðtryggingar, ásamt  þingmönnum, fulltrúum ráðuneyta og Seðlabanka og fleiri góðum. 

Ég er giftur Láru Davíðsdóttur, fyrrum hárgreiðslumeistara og verslunareiganda, 3 uppkomin börn. 
Árið 2012 fluttumst við Lára með verslunarrekstur okkar frá Reykjavík austur á Selfoss. Seldum reksturinn 2016.

Við Lára búum á sumrin í parhúsi okkar á Selfossi og yfir vetrarmánuðina í eigin íbúð á Spáni. 
Ferðalög og golf, gríp í smíðar og aðrar  framkvæmdir, stöku leiðsögn, spila á bassa, ljósmynda, spila tölvuleiki, les góðar bækur og sinni textagerðinni sem hér er kynnt. 

Ég er vel síma- og nettengdur og með góðan tölvubúnað á Íslandi og Spáni og áfram tilbúinn í skemmtilega og krefjandi textaþjónustu sem verktaki í hlutastarfi næstu árin.

Eftir þetta lífshlaup get ég sagt að ég sé reynslubolti, með yfirgripsmikla þekkingu og reynslu.